عكس عكاس| فن صناعة البكش  

أهم حد استخدم مصطلح "بكش" (بفتح الباء والكاف وتسكين الشين) كان استاذنا وعمنا محمود عوض الله يرحمه ، كان بيوصف بيه دايما الكدب اللي بيتروج علشان يداري حقايق مختلفة، والمصطلح معروف شعبياً بنفس المعنى تقريباً وهو تطوير جميل وعميق ل "الكدب" (رغم ان معناه في اللغة العربية مختلف) ، وتقدر تشم ريحة البكش او تحس بوجوده مثلا في الاهتمام الرهيب جدا بنيلسون مانديلا الأيام اللي فاتت، أو في نظرة القداسة اللي الغرب بيديها لواحد زي غاندي.. أو زي اللي كتب التاريخ عندنا بتديها لسعد زغلول ومصطفى كامل باعتبارهم من الأبطال وكده .. أو في الحملات المشبوهة بتاعة حلب تحترق والغوطة بتموت والجو ده

عموما البكش فن أصيل في الحياة وشئ ضروري لابد منه لزرع الكدب في النفوس على إنه حقيقة مسلم بيها، والحياة تستمر بدون قلق .

اليومين دول بنتابع بكش وشه مكشوف شوية..  

لو ركزنا على فضيحة بتوع الخوذ البيضا اللي فرقعت وريحتها فاحت في المنطقة كلها، هنمسك البكش بايدينا ..

 الاخبار اللي بتنشرها اماكن مشبوهة زي رويترز والجزيرة ، واللي هنسف منها وننشرها بالتبعية في اعلامنا الببغائي الجميل ... ان اعضاء المنظمة اللي جيش الاحتلال الصهيوني حماهم وهرّبهم من نيران الجيش السوري للكيان الصهيوني ثم للأردن ..ناس طيبين وانسانيين وبتوع اغاثة والجو ده  

وده حصل بتعليمات من ترامب

 وكنوع من التناحة المخلوطة ببجاحة ووش مكشوف بقوا يسموها جماعة  الخوذ البيضاء السورية للدفاع المدني، واخد لبالك ؟

رويترز بتقول بالنص ( مئات من أعضاء جماعة "الخوذ البيضاء" السورية للدفاع المدني فروا على أثر تقدم القوات الحكومية وجرى نقلهم على وجه السرعة عبر الحدود إلى الأردن بمساعدة جنود إسرائيليين وقوى غربية)

ايه هي القوى الغربية دي يعني ؟ أجهزة مخابرات ولا جيوش ولا كومبارس من فيلم امريكي رخيص من بتوع شاك نوريس ولا ايه ؟

الجيش السوري بيحقق انتصارات في الجنوب وبيحرر أراضي سوريا من الإرهابيين، والمنظمة الارهابية دي مخابراتية قامت بوظايف قذرة في سوريا على أحسن مايكون، أشهر إنجازاتها الافلام المتفبركة بتاعة حلب تحترق والغوطة تحترق واستخدام الجيش السوري للأسلحة الكيماوية وكتير من البكش اللي اتعمل وانتشر في الاعلام العربي والعالمي، واعضاءها متدربين على ايدين اجهزة مخابرات بمشاركة صهيونية.

 الجزيرة.. اللي كانت بتعتمد على اعضاء المنظمة في بيع البكش للعالم كله خلال السنين اللي فاتت نشرت الخبر بنفس طريقة رويترز وباقي منابر الاخبار المشبوهة ..وكانت حريصة انها تأكد ان الناس دي كانت بتشتغل في مناطق الانقاذ (واخد لبالك من الانقاذ دي) لأسباب انسانية بحتة ..آه والله العظيم.

الأجمل هو حالة الحنان والعطف اللي ظهرت في الغرب عموماً بدون استثناء، ويطلع وزير الخارجية الالماني مثلا يقول لك ان الحكومة هتدي حق اللجوء لأعضاء المنظمة وعائلاتهم، أو ان وزير الخارجية البريطاني يقول ان تهريب الناس دي "نبأ رائع" ويشكر الاردن والكيان الصهيوني على "استجابتهم السريعة لطلبنا"، والأمم المتحدة تطلع بيان وكندا ترحب وزيطة كبيرة هتحصل اليومين الجايين .